Maneho di Task Force Karnaval Banda Bou a entregá e relato finansiero i raportahe final di tur e aktividatnan rondó di karnaval di Bándabou 2025 djabièrnè último na Ministerio di Enseñansa, Siensia, Kultura i Deporte.
“Orguyosamente nos por wak bèk riba un temporada di Karnaval 2025 éksitoso. Den un tempu kòrtiku nos a sa di aktivá lidernan di grupo logrando 5 grupo nobo di Bándabou mes i un marcha XL ku un total di 20 grupo”, Nayseline Jamanica presidente di Task Force a duna di konosé. “Apesar ku e parti finansiero tabata un reto, nos a kumpli ku pago di tur esnan ku a duna un servisio òf produkto pa ku e karnaval. Sufisiente finansiamentu i na tempu, ta keda un punto esensial pa asina por plania, organisá i tambe invertí stratégikamente den tur loke ta rondó di e temporada aki. Pa e motibu aki nos ta hasi un invitashon na tur kompania lokal pa uni ku nos na e esfuerso komun aki.
Nos a kuminsá move kaba i for di òktober lo por kuminsá sinti e ambiente karnavalesko na Bándabou. E gruponan di Bándabou ku a forma parti di e proyekto ‘Kreando Karnavalistanan Nobo’ ta hopi animá i preparando pa 2026. Mas ku klaro, Task Force ta bai sigui motivá, guia i duna kursonan no solamente na e lider di e gruponan aki, pero tambe otro lidernan ku ta interesá na lanta nan grupo. Esaki tabata un di e puntonan importante ku Task Force a bai e destaho kuné i pa 2026 nos ta bai sigui fortifiká esaki. Nos ta kere ku ta importante pa ekipá kada un lider pa asina nan tin un fundeshi fuerte pa sigui mantené e karnaval bibu”.
Pa finalisa, Nayseline a duna di konosé ku e tim kompleto ta hopi agradesido. “Task force kompleto ker a yama danki na henter e pueblo di Bándabou, tur e gruponan, tur sponser i boluntario ku a yuda nos hasi karnaval 2025 realidat. Nos ta spera boso sosten i energia positivo pa 2026 tambe”.
