‘Taskforce Karnaval Bándabou’ na inisio di luna di ougustus 2025 a skohe un presidente nobo i miembronan di direktiva nobo pa e dos añanan ku a sobra dje mandato pa organisá Karnaval di Bándabou.
Andre Rojer, Erickson Vicario i Henrich Pieters a bandoná e tim, miéntras Nayseline Jamanica wòrdu skohe komo presidente nobo i Eugene Goedgedrag komo vise presidente.
‘Mi no mester gaña nan a kue mi di sorpresa. Mi a aseptá e reto aki ku hopi orguyo i determinashon. Mi sa ku mi tin e respaldo di e tim i di Bándabou kompletu”.
Nayseline ta un hóben profeshonal oriundo di Bándabou. Un karnavalista del alma ku for di su 5 aña a marcha den karnaval di Bándabou den grupo di su mayornan: ‘Muñecas de Lujo’. “Mi ta gusta loke ta mi kultura i tambe arte. Esnan ku konosé mi sa ku mi ta para pa profeshonalismo, kreatividat i sigur duna Bándabou algu di kalidat”.
“ Organisamentu di un aktividat asina aki ta keda un reto, pero manera mi a indiká promé, nos ta un bon tim. Nos tur tin e mesun meta i ta keda focus riba e 3 puntonan ku nos a bai destaho kuné: Karnaval den bo bario, Krea karnavalistanan nobo i e marcha di kalidat. Temporada di karnaval 2026 ta hopi trempan. Dia 14 di febrüari kaba ta marcha di Bándabou. Mas trempan nos kuminsá, ta mas mihó semper i nos a kuminsá kaba”.
Importante ta pa nos stimulá e habitantenan di kada bario pa partisipá aktivamente, asina Nayseline a indiká. “Esaki ta yuda krea lidernan nobo ku lo karga no solamente e parti organisatorio despues, pero tambe e gruponan ku ta di Bándabou mes”. Karnaval di Bándabou a konosé algun desaroyo positivo, un marcha mas grandi na kantidat di grupo pero tambe un ruta un tiki mas largu ku a kai na agrado di partisipantenan. “ Meskos ku otro organisashonnan ku tin di aber ku Karnaval, e parti finansiero tambe ta hunga un ròl”. Pa krea fondo ta importante pa bo no sinta ketu, pero move. “Nos a kuminsá move kaba, dia 10 di ougustus último Task Force Karnaval Bándabou a djòin ku VIBA pa organisá ‘Let’s Glow and Walk’, un kaminata anual ku Fundashon VIBA ta organisá. Esaki tabata tremendo”. Banda di esaki tin otro eventonan pa rekoudá fondo ku ta pendiente pa wòrdu anunsiá na su debido momentu.
