Djadumingu tras di lomba, durante selebrashon di dia di Bándabou, Task Force Karnaval Bándabou a duna inisio na nan temporada di Karnaval 2026. Alabes a duna rekonosementu na Sra. Dulcella ‘Ella’ Pinedo komo baluarte di Karnaval di Bándabou 2026.
Den union ku Kòrsou den Pabou i di un forma inovativo, Task Force Karnaval Bándabou a disidí pa organisá e apertura riba e mesun dia ku ta selebrá dia di Bándabou. ‘E temporada di karnaval ta hopi kòrtiku i mester pensa kreativo pa asina saka mas probecho di e temporada. Dia 14 di febrüri kaba ta marcha na Bándabou. Mas trempan bo kuminsá ta mas mihó i ademas esaki ta duna no solamente e pueblo, pero tambe e gruponan partisipante e ánimo nesesario pa sigui òf kuminsá ku nan preparashonnan’, Nayseline Jamanica Presidente di Task Force Karnaval Bándabou a remarká.
Banda di esaki Task Force Karnaval Bándabou a skohe Sra. Dulcella ‘Ella’ Pinedo komo baluarte 2026. Komo lider di grupo Tamarein Uní, Ella a sa di forma parti pa kasi 40 aña na e marchanan di karnaval na Bándabou i el a aseptá e rekonosementu aki ku honor. ‘Ella ta un simbolo di perseveransia i un karnavalista di kurason. Semper bai e tin su grupo i su muchanan komo su sentro di enfoke. Nos ta spera ku Ella por sigui engrandesé Karnaval di Bándabou hopi aña mas’, Nayseline a bisa.
E apertura tabata tremendo. Reina di Tumba 2025, Jefdany Manuela a korda nos tur ku bida ta un fiesta i mester gosa di esaki mas ku ta posibel. Grupo di baile D’Art tambe a duna un tremendo presentashon mientras ku e gruponan di karnaval di Bándabou di e proyekto, Kreando Karnavalistanan Nobo tambe a lusi nan trahe di 2025 un biaha mas.
Nayseline ta di opinion ku pueblo di Bándabou tin ku partisipá mas aktivamente den e marcha. ‘Ami i henter e tim di Task Force ta sumamente satisfecho ku e apertura, pero mi ta kere pa nos tin karnaval duradero, nos mester di públiko pero tambe partisipante. Pesei mi ker a invitá habitantenan di Bándabou painskribí den un di e diferente gruponan. Tambe bo por lanta bo mes grupo i korda ku Task Force ta disponibel pa duna guia pa ku esaki’, Nayseline a finalisá.
